【Now新聞台】截至早上11點，1小時內《彭博》用戶關注度上升最多的港股，依次為舜宇光學、中國電信、合景泰富、思摩爾國際、快手。
舜宇7月份嘅產品出貨數據，表現一般，其中手機鏡頭出貨量較去年同期下跌22.9%。車載鏡頭按年升8%，增幅溫和，而手機攝像頭模組嘅出貨量按年幾乎無增長，只係升0.8%。舜宇半日跌5.92%，報219.2元。
京華山一國際研究部主管彭偉新指，攝像模組行業好視乎處於旺季定係淡季，而7月基本上係淡季，加上整個手機行業最近都冇發布會推出新產品，大家唔敢睇得太好。手機零部件行業除咗睇數據，市場亦關注下半年有冇突破。市場宜家較擔心Delta變種病毒會唔會影響歐美經濟回落，預計數據唔足以令大家睇好，股價高位回落跌穿短期支持，但整體跌幅未令到投資者過分擔心。
