【Now新聞台】截至早上11點止，《彭博》Top Search No.1為華虹半導體，第2至第5位分別為保利協鑫能源、閱文集團、中國華融及長城汽車。
今日大市最大焦點係本港恒生科技指數，即係「港版納指」，華虹係三十隻成分股名單之一，但佔比排得好後，得1.32%，不過今日股價升幅就排得好前。雖然公司未講，但市場預測華虹將會同中芯國際一樣，回歸A股市場，就係呢個預測炒起咗華虹？
京華山一國際研究部主管彭偉新指，華虹升勢強勁，除咗憧憬佢會返A股市場之外，仲係因為市場支持國產芯片，同埋炒緊港版納指概念。雖然比起中芯、騰訊或阿里巴巴，華虹市值好細，但當大市炒返相關股份，佢的股價都可以急升，就好似今朝公司已經流入咗大約一億六千萬的資金，而且投資者似乎想繼續持有，唔願離場，估計股價進一步上升機會好大。
