【Now新聞台】截至早上11點止，《彭博》Top Search No.1為金沙中國，第2位至第5位分別為銀河娛樂、聯想集團、領展房產基金及華潤置地。
聯想噚日出業績跑贏大市約6%至7%，大行都睇好佢，佢亦預料所有工廠喺3月底可以復工，似乎都有齊啲利好因素，但股價竟然一度跌至噚日公布業績前5.5元嘅位置，點睇佢個表現？
大華繼顯執行董事梁偉源指，雖然聯想業績係交到數，但喺第一季公司盈利嘅情況就唔係特別好。就算工廠可以復工，個人電腦可以經網上銷售，疫情點都會影響到盈利。而且呢隻股票長線走勢都喺5元或5.8元徘徊，冇乜利好消息刺激嘅話，相信投資者都會考慮喺5.8元「離場」。
Steven話，要睇吓第一季線上教育等嘅數據業務，能否進一步改善到公司盈利，從而刺激股價，建議可以考慮喺5.5元或以下，「逐啲逐啲」買入。
