【Now新聞台】截止早上11時止，《彭博》Top Search No.1為富力地產，第2位至第5位為小米集團、騰訊控股、碧桂園及永利澳門。
由反修例觸發嘅連串示威衝突喺國際間引起幾大迴響，參考Google Search最多人搵嘅關鍵字，台灣第二多嘅係「香港反送中」，排名仲前過「長榮罷工」；新加坡方面，「Hong Kong Protests」排第二，關注程度高過《復仇者聯盟》同新iPhone。國際媒體中，英國《經濟學人》6月以嚟出版30期雜誌，罕有地有3期用香港做封面；研究美國外交政策嘅權威刊物《Foreign Affairs》自1922年創刊，只有18篇同香港有關，同今次反修例相關嘅就已經佔咗6篇。
返嚟香港，恒生指數6月6日，即係首次大規模示威遊行前報26965點，8月時逼近過今年低位，不過今日半日收市前已經上返27700點左右，運動未完結，恒指就已經喺半年間升逾2%，似乎同以往推跌港股嘅「大事」唔同，以往都要見到問題有解決迹象，不利因素反映得七七八八，股市先會反彈。
