【Now新聞台】截至早上11時止，《彭博》Top Search No.1為比亞迪股份，第2位至第5位為融創中國、廣汽集團、建設銀行、中國人壽。
高盛最新出報告唱淡煤氣，評級降到「沽售」兼削目標價，搞到股價今朝一度閃跌，但之後又成功收復失地。過去三年，煤氣估值都獲得重估，主要係睇好集團派息、十送一紅股政策不變，買呢隻股票主要係買佢嘅增長前景。高盛睇淡煤氣主要係宏觀環境差，預期煤氣需求減少，加埋集團本地清潔能源業務急跌，認為煤氣面臨嘅風險正在上升。此外，煤氣另一宗「罪」係估值貴，明年預測PE高得離譜，高達30倍，高過內地燃氣股一大截。
