【Now新聞台】截至早上11時止，《彭博》系統Top Search No.1為平安好醫生，第2至第5位分別係舜宇光學、港交所、華潤啤酒及騰訊控股。
冇聲冇氣兼繼續「潛水」嘅平安好醫生，今日突然炒到「飛起」，一度抽高近11%，抽穿埋51蚊，原來有內地券商估平安好醫生係港股通新貴頂頭大熱之一。
Now財經台評論員趙善真話，呢啲股份一路「潛水」，一定會好多人加埋隻手去沽空，仲形成咗一個雙底，一有消息就會嗱嗱聲補返個底，依家就要睇吓可唔可以破上次個高位，破唔到就要小心。趙Sir又話，平安好醫生入港股通撻Q嘅機會好微。
