【Viu】Ian@MIRROR今日喺會展同Hellosss一齊開生日party！由旁白君擔任MC，佢喺介紹壽星仔出場之後先自肥，復刻返二人喺首次生日會影嘅嗰張即影即有相，重拾當年青澀感覺，自肥可恥但很有用呀！
喺生日會開始無耐，連生日蛋糕都未登場，壽星Ian就提早許願，願望竟然係唔需要Hellosss唱生日歌？席間Ian一共唱咗兩首歌，分別係《抱抱無尾熊》、《留一天與你喘息》，同全場Hellosss大合唱寧舍好聽㗎，又見Ian不斷派福利，喪揮手兼飛吻！
正所謂好事成雙，Ian同Hellosss玩足兩個game，喺大電視環節完美展現到陳仔聰明嘅腦袋，每條都秒答啱，係堅嘅！FC喺尾段準備多個驚喜，包括有生日祝福片、生日蛋糕，Ian見到各地嘅小Hellosss送祝福嗰陣，冧到成個慈父樣都出晒嚟！雖然壽星話唔需要大家唱生日歌，但喺切蛋糕嗰陣又點可以冇音樂呢，Hellosss仲一次過送上多國語言嘅生日歌添！
Ian喺生日會尾聲向Hellosss留下愛的message，又抽問題解答Hellosss嘅提問，超firm表示遲吓solo concert堅係每場唔同rundown㗎！亦有Hellosss發問如果愛犬雞髀有一日變成人，最想同佢講啲咩？最後Ian為見Hellosss多一秒，追加企喺會場門口逐一送別Hellosss，係愛呀！先睇實況重溫生日會精彩嘅moments！
