【Viu】「我最喜愛的男歌手」古天樂趁今日情人節推出首張個人精選專輯《天命最高BACK TO THE PAST》，仲喺商場舉行簽名會，過500位「古太」逼爆4層樓，更有小fans打扮成「盤兒」，勁cute呀！「劉太」甘比亦化身小fans上台送禮兼率先攞簽名，贏咗99.9%香港人呀！
現年63歲嘅標叔叔黃文標，最近因古天樂重召一眾舊拍檔拍攝電影版《尋秦記》，再度飾演「滕翼」一角而人氣飆升！獲封「綠葉王」同「御用惡人」嘅標叔叔，日前接受商台節目《星光背後》專訪，回顧離開大台前嘅坎坷日子：「係唔夠生活，我試過兩個戶口加埋都唔夠100蚊。」又指訓練班出嚟一年120個騷都會爆騷，但後期只拍一、兩場戲，生活捱唔到，仲要改制還騷。標叔叔仲透露有女藝員向公司反映唔夠生活想加人工，結果被叫去考的士牌賺外快，「根本講唔通，唔單止侮辱嗰個演員，係侮辱成個行業。」
2012年，標叔叔心淡離巢投奔王維基，但HKTV未獲發牌，2016年開始失業。佢笑言：「試過兩年遊手好閒，洗晒啲積蓄。」期間曾喺朋友海鮮檔做司機送魚，近年喺裝修公司做除甲醛師傅，但佢強調只係兼職，一有戲就即刻返去演戲，因為佢真係好鍾意演戲，「最吸引係可以演譯唔同人生。現實生活，我點可以做有錢佬、強姦犯或者劫匪？係好過癮！」唯一遺憾係未演過皇帝，「最想演一次皇帝。」佢笑稱唔介意被人叫綠葉王或者耶穌，但唯一介意就係「茄哩啡」三個字！
成長於石硤尾邨嘅標叔叔，係六兄弟姊妹嘅孻仔，佢感謝已故父母同家人疼錫，冇經濟壓力迫佢轉行。但佢亦坦言五年前拍拖多年的女友因經濟因素離開，「遊手好閒嗰兩年，女朋友一路催我要搵返份工，「『你要搵嘢做啦！』最後分開，打擊好大。」而對已故母親嘅遺憾亦令佢語帶哽咽：「媽咪成日想飲我杯新抱茶，但最終唔可以圓佢嘅夢。」
