【Viu】Jay馮允謙早前推出英文新歌《Close to the Edge》，歌詞第一句「Sitting in the back seat of a yellow taxi」引發靈感，就決定約3位「追風」分別單獨搭的士唱歌傾心事。
首位上車追風表示正準備考飛機師牌，Jay祝福對方：「佢跟咗我好耐，我認得佢。佢話要考機師，我希望佢成功，到時請我搭飛機，講笑！佢仲提議我同fans喺飛機艙搞聚會唱歌，呢個主意超正，我好想喺私人飛機唱歌，希望公司安排！」
第二位追風更大癲，將Jay歌《Keep On Fight On》其中一句歌詞紋身喺手臂，係愛呀！第三位粉絲係一名學生，因為靠偶像嘅歌幫助渡過艱難時刻。Jay又表示成日戴口罩搭的士，但都獲司機認得，仲不時播佢啲歌添！
