【Viu】「小BiBi」張繼聰喺情人節晚上竟然賣甩索妻Kay同一對仔女，單拖出活動搵真銀！佢得戚指一早就已經交咗人，陪老婆食咗個靚早餐，更提前送埋禮物，透露今年走物慾路線，去名店買包包兼飾物，小BiBi出手勁闊綽呀！笑問有冇八仔仔張瞻喺情人節有咩節目？佢笑話冇，但好鼓勵仔仔拍拖，相信跟「原廠設定」必定係溝女高手！
喺過去嘅農曆新年，阿聰幾乎日日為《祥賭必贏》跑戲院謝票，現票房已收破千萬，阿聰話會繼續現身謝票，仲會做埋網上謝票添！講到日前佢怒回電影評論版主，阿聰表示件事已經過去，知道事後有唔少網民對版主作人身攻擊、負面批評，佢話要講聲唔好意思，亦感謝版主有支持《祥》，同時阿聰都有檢討自己用詞係咪可以再好啲嘅！
阿Sa被傳翻撻「百億麻雀館太子爺」石恆聰，阿聰話完全唔知情，利申謝票除工作人員見唔到其他人，新年開party亦唔見阿Sa攜眷出席，最緊要係阿Sa開心！阿聰又笑話當日個剷錢game係阿Sa啲鬼主意，佢就只係負責派錢！
另一好友方力申今日宣布結婚ed，阿聰話好戥小方開心，喪讚佢係一個超好男人，希望對方快啲加入爸爸會！另外，金像獎啱啱公布咗入圍名單，朱栢康憑《破·地獄》角逐「最佳男配角」，阿聰點祝賀兄弟？快啲睇足本訪問片啦！
