【Viu】台灣著名女星大S徐熙媛春節期間同家人去日本度歲，不幸染上流感併發肺炎，經搶救不治，噚日喺當地病逝，終年48歲，消息震驚中外。妹妹小S徐熙娣今日透過經理人證實噩耗，大S嘅遺體會喺日本火化，亦會喺當地舉行告別式，最後再運返台灣安葬。而正喺泰國旅行嘅前夫汪小菲亦已急飛返台灣。
大S對上一次公開露面，係參與台灣製作人王偉忠囡囡嘅歸寧宴，當時孖住老公具俊曄、小S舉杯暢飲，精神不俗。受喪妻打擊嘅具俊曄，今午悲痛向韓媒表示「我不太好」，今個月8號係大S同老公結婚周年紀念日，兩夫婦原本準備慶祝3周年，可惜如今天人永隔。
大S 1994年出道，2001年憑住同F4合演《流星花園》杉菜一角爆紅，佢喺圈中人緣極佳，唔少好友都未接受到消息，包括朱孝天、楊丞琳，好姊妹林志玲、賈靜雯、陶晶瑩，以及電影拍檔古天樂、 劉德華同埋陳曉東等等都發文悼念，懷愐大S生前點滴。
