【Viu】台灣金曲歌后徐佳瑩(LaLa)同香港音樂才子林家謙有咩關係？家謙今晚出現喺紅館，為《徐佳瑩「變得有些奢侈的事」巡迴演唱會》-香港場擔任表演嘉賓，炎明熹、Kendy Suen都有嚟捧場呀！
當LaLa唱完《雛形》後，透露正籌備新專輯，9月初時收到一首歌，佢太愛個旋律所以歌詞寫得超快，然後介紹完歌曲內容後，就好興奮咁話，今晚第一次演唱呢首歌，並請到作曲人上嚟，全場歡呼尖叫，林家謙升上台後，二人合唱《遺失的靈魂》！
西裝筆挺嘅家謙唱完大嗌好緊張，話LaLa將首歌介紹得好凝重，LaLa未等佢講完就叫佢靠近啲，問做咩要隔咁遠，兩個即做扯大纜動作，慢慢企近啲傾偈，好搞笑！然後LaLa問家謙寫呢首歌時有冇諗住佢，家謙好誠實咁話首歌當初係寫俾一位台灣男歌手，大讚LaLa連男生key都駕馭到，後來又話要客氣啲講，其實係諗住一匹白馬喺遼闊嘅草原、喺沙洲奔馳嘅感覺而寫，擺明tagLaLa首《失落沙洲》，搞到LaLa笑到踎喺地，不過佢都係照投訴家謙啲歌好難唱！
後來家謙又講笑話LaLa喺台上咁E，LaLa就爆家謙綵排時好怕醜，然後又叫家謙企埋啲，聽到家謙問自己MBTI係咩，LaLa話其實係I，喺台上必須要E，喺家謙身邊仲要E到不行，又讚家謙係好可愛嘅I人！家謙就話同佳瑩嘅名字好有緣份，佳瑩叫LaLa，自己喺香港有外號叫喃嘸，笑話下次叫到佢可以叫喃嘸，仲送咗件自家出嘅白色喃嘸tee俾LaLa，不過家謙又同觀眾講，喺街唔好叫佢喃嘸，叫返家謙就可以，成段對話都好爆笑，快啲睇實況片啦！
