【Viu】音樂監製Edward Chan嘅亞博個人作品展《Blueprint of Memories, by Edward Chan》，尾場圓滿結束！喺頭場唱《忘記歌詞》嗰陣唔小心跌坐落地拗柴嘅陳柏宇，為撐老友Edward Chan今晚負傷報到，喺台邊撐住拐杖出場，夠雷！喺全場fans拍手鼓勵兼狂嗌「陳伯」打氣之下，佢再挑戰唱《忘記歌詞》，喺邊度跌低，就喺邊度企返起身！而佢因聽從醫生建議多休息，所以淨係表演咗一首歌就早退！
「教主」Anson Lo喺尾場一共演唱6首歌，簡直係見盡撈撈豬唔同嘅一面！「情深撈」嘅部分係《神隊友》、同徐浩合唱《永順街39號》；「Rock撈」有同樂隊Dear Jane合唱《到此為止》；「開心撈」係獨唱《Megahit》，追加同Edward Chan跳舞；至於「Sexy撈」就非同「小明」方皓玟合唱《My Life》、《Unblock Me》莫屬，教主同小明互摸又身貼身跳舞，火辣程度係5**，全場「神徒」睇到熱血沸騰！
初出道嘅樂隊ROVER首踏亞博舞台，帶嚟首支派台作品《秒速8公里》，四子零怯場勁有台型！側田、Cousin Fung合唱《咖啡因萬歲》，唱唱吓仲遞埋支咪畀Edward Chan，主角又肯開金口唱埋一份，氣氛超high！而尾場嘅特別嘉賓就係「皇后」Ivana王菀之，fans一見皇后出巡秒起哄，Ivana演唱《好時辰》令全場fans集體耳朵「懷孕」，有片有真相，去片聽歌！
