【Viu】193郭嘉駿今年首支派台歌《B出口》，將於3月26號推出，佢之前預告話今次MV搵嚟一億票房嘅「國際大導演」執導，開估啦，原來係ERROR好兄弟何啟華（Dee哥）處男下海做MV導演，3爺笑言係出於「同理心」：「Dee每隔幾個月就話拍MV可以搵佢做導演，當然冇人理佢，但大約係半年前，有次ERROR 4個人都喺度，佢又再講多次，下次你哋拍MV不如我做導演，然後我目睹肥仔同保錡冇出聲兼走埋，但我肯定佢哋係聽到，Dee好似好尷尬，又冇出聲扮冇講過。我目睹呢個畫面，同理心發作，就搵Dee大導合作，圓佢夢。」
對於Dee哥嘅導演處男作，193當然以一貫嘅幽默風格去評價，仲笑「副隊長」爆Budget爆到要「貼錢」，呢舖真係陰功豬咯！Dee哥仲笑言壓力大到頭髮都甩晒，但感覺超爽！想睇193同Dee哥有幾「一世人兩兄弟，有你有我」，睇足本訪問咪知囉！
