【VIU】「Carl叔叔」王雙駿嘅個人作品展，今晚喺會展舉行，去到尾段樂隊The Duo Band出場時發生舞台意外，嚟自澳洲嘅樂手Paul不慎跌入5呎升降台，演出即時暫停。
Carl叔叔事後同主辦單位電笠總監王昱一齊受訪作詳細交代，指因為台面比較黑，樂手唔為意踏空，幸好只有大髀位擦傷甩皮，而樂手等救護車嚟嘅時候係保持清醒，仲識講笑，最後更叫Carl叔叔繼續唱落去！Carl叔叔重申舞台係經過好嚴謹嘅安全審查，雖然腦海有一刻閃過腰斬個騷嘅念頭，但佢自覺有責任唱落去，好快就調整心情同Eason陳奕迅繼續演出，並稱之後會去醫院探望樂手。而電笠亦在fb發文，指樂手正接受治療，情況穩定！
「雙Jer」Jer、Jeremy臨飛英國開巡唱前任嘉賓，Carl叔叔指好感動，特別係Jer堅持留至最尾部份唱埋「樂壇已死」先趕去機場！久未公開演唱嘅謝霆鋒更係問都冇問就一口答應，Carl叔叔笑話希望盡快撻着霆鋒開騷嗰團火，令佢暫時放低鑊鏟拎返起支咪！至於被軟硬天師惡搞，Carl叔叔又點睇？即刻去足本訪問！
