【Viu】張繼聰、梁釗峰、Manson張進翹今晚喺麥花臣場館開騷！配合音樂會主題，會場中間放有一張「小圓台」，四面台、冇大熒幕、冇煙火等特別效果，純粹以歌會fans，傳遞歌意，最簡單但係最直接！首先登場嘅係佬味濃嘅阿聰，佢熱唱《半江紅》同fans叉足電，成個場瞬間high爆！
第二位上台嘅係Manson，帶嚟新歌《那讓我們一起》，佢話係佢寫得最快、最鍾意嘅一首歌，係送畀呢個moment選擇留喺度、呢晚嚟睇騷嘅朋友仔！Manson亦揀咗阿聰首《循環線》嚟唱，仲邀請埋呢位原唱為佢結他伴奏，呢個限定version令全場fans聽出耳油！
壓軸出場嘅係釗峰，佢演唱Manson嘅《無可救藥的浪漫》超有feel，唱到中段再邀Manson上台crossover帶動氣氛！最後一首歌《遺憾與遺憾的一切》，就係釗峰新推出嘅第3隻同名個人大碟，新鮮滾熱辣送畀fans！臨完騷前佢哋互相感謝，呢part絕對係男人的浪漫！釗峰、Manson講講吓仲攬攬兼疑似嘴對嘴錫錫！想睇真啲就去片啦！
