【Viu】MIRROR噚晚獲得「叱咤樂壇我最喜愛的組合」，隊長Lokman喺台上分享感言：「2023年好多個我，但好少我哋；2024年希望可以一齊為大家、為鏡粉做更加多嘅作品。」佢哋講得出做得到，第二日即係今日，MIRROR團歌《Rocketstars》馬上上架，佢哋用歌曲展現12個人一條心，齊齊為團體而奮鬥向上！
「Rocketstars」一字包含咗Rocket火箭呢個字詞，其實係為MIRROR嘅發展帶嚟新嘅寓意同動力。Rocket火箭係會一直向上升空，MIRROR呢首新團歌，其實係12子下定決心許下承諾，喺2024年，MIRROR會一條心一直向前衝刺，奮力向上，而且好似火箭一樣一路向星空進發，永不停步。
對於MIRROR嘅成長，隊長Lokman表示：「每個人嘅性格，又或者作品嘅風格都愈嚟愈明顯同成熟，大家喺舞台上拿捏節奏同熟悉感快咗，唔同場館、唔同活動類型，好快手知道發生緊乜嘢事，好快融入其中。」至於未來嘅目標，就係即將舉行嘅香港演唱會同埋世界巡迴演唱會，而12子亦各自set咗唔同目標，即刻睇足本訪問聽吓佢哋點講喇！
