【Viu】 Merry Christmas！MIRROR早前遠赴澳洲拍攝嘅團綜《MIRROR Time》今晚首播，陪大家歡渡聖誕，首次全員去旅行，當然有唔少趣事開心Share，身為隊中「頭腦擔當」嘅AK，笑料百出，仲孖Frankie同Alton上演咗10分鐘「澳洲捉烏蠅記」，搞到皮皮high high哋，誤爆當地烏蠅識開門，嘩，莫非真係DNA出錯？至於「米媽」Jeremy雖然今次唔使幫Edan通渠，但都有煮早餐，為人民服務，向來細心嘅佢，仲自爆帶足兩個喼同行，堪稱MIRROR中嘅「喼神」呀！而Ian就透露此行練成搭車瞓覺大法，每個location個半鐘嘅車程，正正係佢哋最好嘅休息時間，被問到有冇時間做Gym嗰陣，「風趣陳」就用食字gag嚟拆解，仲學人扮嬲豬，搞到AK即刻出馬氹返「老四」呀，認真搞笑！
除咗合宿產生無限趣事外，Lokman仲出路遇貴人添，事緣隊長同Alton、Tiger拍攝小組item嗰陣，偶遇一位移居澳洲嘅港媽，竟然「搞喊」對方添呀！想知MIRROR喺澳洲有咩趣事，教主點解要「執飯食」？姜濤做咩笑唔停？大表哥同Jerdan點樣互相「傷害」？記得loop爆足本訪問食花生喇！
