【Viu】《培生擂台：無敵盃》今晚戰況激烈，全晚最矚目嘅拳賽非霍哥打周永恆莫屬，4 Round之中，周永恆多次犯規打後腦被警告，而全場觀眾幾乎都係霍哥Fans，不停幫佢打氣，手長腳長嘅霍哥亦多次請周永恆食重拳，贏係常識。
霍哥喺台上感觸派洋蔥：「減咗30磅好辛苦，打到pat屎咁！多謝阿媽，呢排我脾氣好差！我想多謝阿晶，佢係我恩人，其實我可以開直播鬧微辣仆街，但我唔會。我會將今次拳酬全數捐出去澳門人人流浪狗義工團，以阿晶名義捐錢，希望大家以後提阿晶唔再係報仇，而係做善事。」
龍心大戰劉馬車本來亦係重點賽事，可惜劉馬車因涉嫌非禮13歲女童噚日被捕一直出唔返嚟，結果大會臨時安排龍揀對手，俾佢揀大戰台灣靚仔宗健或者曾獲金腰帶嘅曹Bee，卒之龍心自信揀打晒兩個。不過當然最後都輸晒，根本唔夠人打！
同時大會亦搵咗24個海選贏咗或有觀賞性嘅選手分組上擂台。其中最有睇頭係前微辣Black Joe對泰國響尾蛇，兩位專業拳手打到嘭嘭聲，結果Joe以點數贏！
要數有牙齒印嘅一組就係Chris VS Johnny，兩位都係前「亞視一姐」阿儀嘅前經理人林寶玉嘅舊愛，原來係情敵，Chris聲稱對方橫刀奪愛，最後都贏咗，更攞彩話對手：「做咗咁嘅嘢係有報應！」
另外魔筋二世斌叔對將軍澳尚德，同宮田一郎大戰燒賣會長一場，選手造型特別，想睇？睇現場實況片啦！
