【Viu】由Gao@COLLAR、強尼、張達倫、Alan陸駿光、陳子豐同「阿雞」邱頌偉主演嘅ViuTV新劇《出租大叔》，今日完成主景車房拍攝。劇中飾演父女嘅Gao同強尼笑話最難忘喪BBQ、打邊爐，強尼坦言肥到着戲服嗰陣覺得窄，勁羨慕個「女」Keep到馬甲線，又指同Gao似巴打多過似父女添！Gao就搞笑話開工對住成班「大叔」有被麻甩化，耳朵展開新世界咁，係同平時同COLLAR齋傾甜品截然不同！
張達倫、Alan互爆劇中超有女人緣，先數到Alan喺劇中同女演員對戲最多嘅，但就缺乏佢最期待嘅親熱戲；相反，張達倫自爆最激嗰場「埋牙」戲齋「坐喺度」就得，而對象就係芯駖@COLLAR！
佢仲愈爆愈多，話呢場激情戲係佢入行以嚟，最要撳住自己反應嘅一次，唔知女導演有冇take到啲特別鏡頭啦！事後張達倫驚驚話怕被「雞湯」圍剿，咁佢又怕唔怕被老婆追殺先？另外，張達倫同Alan又講到如果之後再合作，就想拍一個時下超hot嘅題材，想知係咩？佢哋仲爆咗啲咩拍攝內幕？咁就要睇足本訪問啦！
