【Viu】COLLAR成員Winka陳泳伽繼三月推出個人單曲《一手造成》，喺網上破百萬點擊後，噚日(15號)再出新歌《奇異小姐》，今次唔再談情，反而係以勵志為題，講「追夢」，無論遇到幾多挫敗都要堅持、不斷嘗試，終歸可以達成目標，就好似Winka嘅音樂路一樣，遇上挫折依然屢敗屢戰，勇往直前！Winka表示：「面對自己追求嘅嘢，好多時喺過程都會遇上挫敗，可能因為不成熟，或者未有經驗，所以未得到成功，但只要堅持，就算帶點儍氣，亦會有人懂得欣賞。」
Winka仲分享咗自己人生遇過最大嘅挫敗，就係聲帶受傷，嗰時佢直情唱唔到高音，要逐個Key去練，花咗足足半年時間先回復以前嘅聲線狀態，但呢件事令佢更加明白只要唔放棄，搵到合適方法，肯花時間一定可以重拾自己嘅步伐。佢亦相信努力唔會白費，上天及身邊人一定會睇到。
而講到啱啱完成團歌《idc》，就緊接推出個人歌曲會唔會有壓力，Winka就表示呢段時間推出團歌再加自己歌，成件事感覺好圓滿，零壓力。另外佢透露今年會推出4首單飛歌曲，希望剩低嘅兩首作品可以嘗試唔同曲風，仲呼籲大家密切期待添啊！
