【Now.com】江海迦 (AGA) 嘅首個紅館演唱會，過去幾年因為新冠疫情已先後兩次取消，今年終於願望成真，將於8月26及27日假紅館舉行一連兩場《AGA ONEDERFUL LIVE 2023》。
仲有一個多月就開騷，AGA全情投入準備，日日做gym勁操兩個鐘再加排舞，不敢怠慢，AGA過去三個月一直跟隨健身教練嘅營養餐單，攝取大量蛋白質，令身體有強健體魄應付各樣工作，同時亦增肌駕馭「戰衣」。佢話：「我感覺到體力上不斷有進步，希望上到舞台可以有足夠嘅力量去應付每個部份演出，將自己最好嘅狀態留給歌迷。」
演唱會門票明日 (11日) 開始於城市售票網公開發售，演唱會舉行在即，AGA坦言：「今次同上兩次準備紅館演唱會嘅心情一樣期待，每一次喺街上面遇到歌迷，總會問我幾時開演唱會，依家終於有機會跟歌迷見面，可以分享所有自己嘅音樂作品，非常期待。」
演唱會資訊：
《YOKU MOKU x AGA ONEDERFUL LIVE 2023》
日期：2023年8月26及27日
地點：紅磡香港體育館Hong Kong Coliseum
票價：HK$880 / 580 / 380
Jeremy狂呻唔鍾意做Gym 如果有超能力會揀冰元素！
至於另一邊廂，同樣下月舉行演唱會嘅Jeremy 李駿傑，就喺社交平台出post狂呻，話「如果我有超能力 第一個應該會選擇 冰元素 第二就一定會選擇 唔使做Gym 都可以強壯 我真係唔鍾意做Gym」、「Ps 我真係一個宅男 宅男係喜歡係屋企 唔係Gym room」。
似乎Jeremy相當唔enjoy 做Gym ，無奈為咗開個唱，想有更靚體型，唯有走入Gym room。Jeremy嘅首個個人演唱會《網上行夢想系MOOV LIVE JEREMY》，將於8月30日喺香港會議展覽中心舉行。Jeremy表示希望是次演唱會可以為一眾樂迷，帶來好似菱鏡折射多樣面向，一次集合自己狂野、魅惑、感性同活力嘅特質與精彩演出。
Photo / Facebook@Jeremy Lee 李駿傑
