【Viu】由林家棟同Lokman楊樂文主演嘅電影《命案》，噚晚舉行首映禮，作為MakerVille頭炮電影，公司一眾藝人當然要落力支持，包括ERROR成員肥仔、Dee哥、193同P1X3L成員Phoebus、Marco等，MIRROR仲總動員現身撐隊長！
家棟自爆最多NG 53次，破晒紀錄，仲話拍到洩氣兼崩潰。至於Lokman亦因為角色沉重而拍到喊，但希望再同鄭保瑞導演合作。佢又話如果隊友睇完猙獰演出後，會驚咗自己就好，可以不怒而威！不過，現實中嘅Lokman好怕醜，喺金像獎慶功竟然唔敢搵劉青雲單獨合照，仲驚嘆對方齋望都好有型，又笑言叫楊紫瓊前輩耐心等候自己進軍奧斯卡！
MIRROR成員近期強攻影壇，最年輕嘅Tiger仲升呢做電影導演添，為《鮮浪潮國際短片節》執導一套名為《是日精選》嘅劇情短片，搵咗Lokman做男主角，飾演黑道車手；AK、Frankie同Jeremy都有份演出，AK仲劇透話自己要扮女人，OMG！好期待呀！
