【Viu】梁朝偉噚晚出席新片《無名》首映時話，為咗講普通話對白，專登搵老師惡補，但係就冇請教老婆劉嘉玲喇，又大呻同王一博嘅對打戲好難，好彩大家都冇受傷。除咗拍電影，偉仔早排仲話想再拍劇，令演藝生涯有始有終，只要角色吸引，美劇、日劇、韓劇都殺呀！
講到星期日舉行嘅《亞洲電影大獎》，偉仔憑《風再起時》提名影帝，佢直言睇好《Drive my car》嘅西島秀俊，亦謂冇被提名金像獎「最佳男主角」唔失落，希望畀多啲機會後起之秀！
此外，衛詩雅、湯怡、沈震軒同彭秀慧導演等都有撐場，詩雅自爆因檔期而錯過同偉仔合作嘅機會，如果將來再有機會，當然想合演情侶，但做工人都唔Mind㗎！佢又話會為陳家樂婚禮任兄弟團，唔怕畀姊妹團玩；湯怡就會一家三口去飲，仲催家樂快啲生B添！
