【Viu】4位女神Annie劉心悠、Sofiee吳海昕、Ashley林愷鈴同Jocelyn陳明憙今日出席護膚品活動，Sofiee透露之前去日本旅行喪行街買嘢，日行50公里，搞到瘦咗幾磅，但只係使咗一萬蚊，最可惜係冇艷遇哩！Ashley就有捧新劇《繩角》場，媽咪龔慈恩都評論佢嘅演出，又話見到鏡仔打擂台，除咗心心眼，仲膽戰心驚，事關齋睇都覺得痛呀！佢又預告為咗新劇操大隻，咦，莫非又同鏡仔合作？
至於Annie最近就學整法國餐，為咗專心完成8個月課程，暫時唔拍戲或拍劇，仲自爆為學廚切傷手同畀焗爐焫親呀！此外，Jocelyn細妹都將會嫁人，佢哋早排仲搞咗個峇里島姊妹Tour，又笑言會mark實細妹個花球。
