【Viu】Gareth.T 湯令山一連三場處男九展騷完滿結束！尾場繼續有好兄弟Tyson Yoshi，佢先搞笑話要同樂隊Dear Jane嘅Jackal講對唔住，因為本身佢係要去撐DJ開騷，但聽到Gareth.T叫聲「Hey Baby」就即刻過嚟幫拖，果然係好兄弟！
當然仲有女朋友Moon Tang呢位駐場嘉賓啦，呢對小情侶放閃放到如旁若無人境界！去到問答環節Moon被問：「Day@COLLAR做嘉賓你有冇嬲？」佢搞笑拉長尾音答：「冇～」Gareth.T聽到即刻用刻有「I ♥️ MOON」嘅杯飲水，求生欲極強！不過佢自爆原來個杯另一面係「I ♥️ DAY」，認真大膽！提起首場Moon自爆鍾意Gareth.T因為佢「夠矮」，Gareth.T似乎有啲微言咁喎！
至於另一老友姜濤就因為腳傷嚟唔到做嘉賓，改以電話方式特別獻聲，期間搞笑對Gareth.T講：「唔好紅咗唔寫歌畀我！」Gareth.T亦話雖然姜濤嚟唔到係有少少遺憾，但覺得對方已經做盡，已約定下次開騷合體！
