【Viu】 香港亞洲電影節呢日喺圓方舉行閉幕禮，大會邀請咗兩齣閉幕電影嘅團隊出席，包括由鄭秀文、陸駿光主演嘅《流水落花》同張艾嘉、蔡思韵(Cecilia)主演嘅《燈火闌珊》。Cecilia今次喺戲中同張姐飾演一對母女，佢都話喺張姐身上學到好多嘢！提到張姐有份角逐19號舉行嘅金馬獎「最佳女主角」，佢18號就會飛去台灣出席，但對於獎項，張姐就話：「做好劇本嘅角色，其他都係睇運氣啦。」另外張姐同Sammi合作嘅新戲亦即將上映，佢表示因為呢部作品，同Sammi都變成好朋友，仲大讚對方呢兩年進步好大添！
而得知張姐咁讚自己嘅Sammi都話非常開心，因為喺演戲上一直都比大家想像中認真同努力，佢自己都覺得依家演戲變得更加從容，仲話希望大家喺《流水落花》入面睇到佢嘅進步，另外提到鄭裕玲日前話想拍返戲，Sammi會唔會想同對方合作？佢話：「一切以劇本為主，如果啱就拍，唔啱都冇辦法。」
