【Viu】王麗嘉（Irisa）、女團Strayz今日性感現身活動，一向對show身材無限制嘅Irisa晒酥胸兼透黑底上陣，透露原本已經飛咗LA準備家姐王曼喜嘅婚禮，但因為愛犬不適入咗院要延後出發，身兼伴娘嘅佢自言幫唔到家姐手都有少少唔好意思：「家姐要求我講speech，到時一定會喊，唔慣喺咁多人面前講嘢，好大壓力！」有想婚諗頭？佢笑話依家單身都過得好好，不過又爆身邊有有好感嘅男仔，本來仲約埋對方一齊去LA添！
講到Strayz今次又四缺一，成員笑話因為Ariel要返學，所以嚟唔到。數到最性感就一定係暐翹同CK，前者黑bra襯透視衫、後者着低胸lace裙，佢哋話底線係三點不露，暐翹仲笑話拉丁舞衫更sexy；若隱若現嘅代表就有榛綦，而最密實就係VAL，佢笑稱自己最保守，唔怕畀隊友搶風頭，可能他朝一日嚟個大解放！
