【Viu】Jeffrey 魏浚笙飾演「天才泳手」余浪沖的劇集《I SWIM》已經播出一半，Jeffrey表現大獲好評，近日正式成立個人官方FC，今日頭炮活動一班「咖啡豆」就安排余浪沖雪糕車於尖沙咀鬧市免費派發雪糕，為市民消暑降溫，吸引過百人排隊領取雪糕及圍觀！
向來愛錫「咖啡豆」嘅Jeffrey親自到場答謝粉絲，佢話自己非常驚喜，同時多次提醒粉絲要注意安全，又收下粉絲禮物。講到佢演出余浪沖一角大獲好評，Jeffrey好謙虛咁話從來冇預計過：「自己係新演員，唔好拖累劇組進度，盡左力就順其自然！留返俾觀眾評分，希望合格！」《I SWIM》星期五播出大結局，Jeffrey直言不捨得，希望相約台前幕後一齊睇大結局，對於被網民發現先前一集Jeffrey與袁澧林夜闖泳池戲分鏡頭失焦，Jeffrey承認起初有收到消息要重拍，但最後可能因時間問題趕出街而照用。
Jeffrey先前在網上分享脫胸毛感受，未來亦不排除代言脫毛廣告，仲笑住話：「身為演員隨時演任何角色都可以，同我啲胸毛一樣，可脫嘅時候就脫，唔脫果時就留喺度！」Jeffrey仲話最滿意自己鬚根部份，想嘗試滿面鬍鬚角色，有型男荷里活感覺或者滄桑一面都好正！
