【Viu】踏入2022年，Ian主力做唱作歌手，先後推出咗2首甜到爆嘅情歌
《留一天給你喘息》同《GotU》，而第3首solo《Distance》7月15號亦正式派台，MV上架17個鐘已經突破30萬點擊，認真犀利！而今次Ian仲身兼曲詞監唱四職，實行瞓身向唱作歌手呢條路進發，不過佢就自爆做呢隻歌嗰陣有段小插曲，首歌嘅demo，Ian之前明明刷牙沖涼瞓覺都一直聽，但點知錄完做埋後期之後，Ian反而少咗聽，佢再認真聽多幾次之後，發現原來係自己問題，覺得自己唱得唔好，雖然會麻煩到其他人，但佢最後都決定重新錄過首歌，因為Ian認為首歌一日未面世就即係仲有進步空間，所以一定要做一個最好嘅版本出嚟，呢種堅持係值得大家學習嘅！
另外因為新歌係講一段關係越行越遠，由傷心去到唔識反應，再說服自己要move on，所以喺MV入面，Ian除咗一直擺出Poker face，仲不時閂埋房門開啟自我保護mode添，而喺現實中，佢亦因為表情唔夠豐富而俾人誤會佢黑面，不過Ian就話其實佢只不過係發緊呆，所以望落去先會冇咩表情，並唔係因為嬲或唔開心，亦唔係黑面。
