【Viu】 Jay Fung 馮允謙九展個唱噚晚第二場，除咗有師弟軟骨BEN同師妹黃淑蔓嚟撐場之外，龔慈恩囡囡 仙氣十足嘅林愷鈴都有入場支持！而噚晚嘅表演嘉賓，就係同阿Jay惺惺相惜嘅唱作才女AGA 江海迦，佢哋手拖手合唱AGA嘅人氣作品《3AM》！喺演唱會上阿Jay分享當年經歷事業低潮嗰時，多得AGA喺一程飛機上對佢嘅鼓勵同開解，先令佢冇放棄《一步一悔過》呢首咁好聽嘅歌，AGA仲話自己一早預見到阿Jay會成功㗎喇！除咗多謝AGA，阿Jay當然都冇漏咗一直喺佢背後支持嘅屋企人啦！阿Jay仲當眾對媽咪示愛，大嗌「I Love You Mum」真係Sweet到爆啊！
