【Viu】 一年一度嘅母親節又到啦！育有3個小朋友嘅何嘉莉（Lillian），擔任最新一集《Viu1 人物專訪》嘅嘉賓同大家分享育兒心得！雖然Lillian有9年做媽媽經驗，但佢笑話到呢一刻都仍然係「緊張大師」，無論係啲咩大小嘅事，只要係關於小朋友嘅，都會超級容易變得緊張，有時仲會搞到失眠添！
疫情期間Lillian多咗時間同小朋友相處，同時有段時間亦令Lillian好崩潰，因為佢全家都不幸確診新冠肺炎，佢直言最擔心嘅係3歲細囡，囡囡發高燒又產生幻覺，搞到佢不知幾咁心痛又擔心，好彩小朋友新陳代謝快，好快就康復！而喺今集專訪嘅最後，Lillian教大家畫幅母親節嘅創意畫送畀媽媽，佢仲親筆手寫咗封信畀小朋友，真係好sweet呀！喺度祝各位母親，母親節快樂！
