【Viu】 男神Jeffrey聽日就大一歲啦！一班「咖啡豆」為慶祝偶像生日可謂絞盡腦汁，喺唔同地方搞生日應援，包括茶店、coffee shop、cafe等。而Jeffrey趁今日、正日生日前夕，去到新蒲崗嘅coffee shop近距離同「咖啡豆」見面，一出場就引嚟附近街坊圍觀，Jeffrey對fans要求自拍、簽名統統來者不拒，俘虜男女老幼大晒親和力！
得到「咖啡豆」嘅寵幸，又有生日蛋糕做surprise，Jeffrey開心話好感謝「咖啡豆」嘅付出，願意花心機、時間喺佢身上，所以會盡量親自走勻咁多個生日應援站打卡嚟答謝fans。當知道「咖啡豆」以佢名義捐款至慈善機構，Jeffrey窩心話每個人都必須做善事，好開心見到「咖啡豆」有呢個舉動。問到聽日點慶祝生日，適逢放寬防疫措施，Jeffrey話除咗繼續去生日應援站打卡之外，都會同女朋友二人世界食餐生日sweet住慶祝！
另外，「咖啡豆」Chinly、Toby受訪表示今次生日應援籌備咗個幾星期，因為都係第一年同男神慶祝生日，所以心情特別興奮。
