【now.com】話說幾乎每個歌手背後，都有起碼一個瘋狂Fans，瘋狂程度不一，行為各異。周柏豪近年遇到個岑小姐，佢嘅瘋狂來自在柏豪Facebook嘅留言，例如：「柏豪你不想跟我一起的，早點揚聲拒絕我，我會盡快找第二個結婚懷孕。」又或者「柏豪啊新聞說你將會離港去拍戲四個月，你唔怕我移情別戀嗎？」甚至「柏豪我搬去你屋企長住好嗎？」岑小姐算好有禮貌，一啲都唔激烈，係內容夠爆笑，所以成為矚目人物，唔少人專登like柏豪Facebook，就係為一睹岑小姐風采。
柏豪都唔係好識處理呢件事，一直以來都冇回應過岑小姐，但亦任佢留言，唔會刪除，一來內容唔係有威脅性，二來大概唔想做多餘事刺激佢情緒，對外亦冇回應傳媒有關岑小姐問題，直至噚日終於開腔回應，都係話唔想搞大件事之類。
岑小姐都唔係第一個痴情痴到出名嘅fans了，要數元祖級，一定係林楚萍（肥萍），肥萍追譚詠麟追足三十年，校長去邊佢就跟到邊，後生時試過追到校長幾乎炒車，而家已發展到好似工作人員一樣，有時校長行得快都會回頭望：「肥萍呢？」呢種感情唔係一般人可以感受到。
梁詠琪fans梁仲安（阿John）在行內都好出名，佢係仁濟總理，有錢有面，但從一開始就迷上梁詠琪，於是佢改行開公司做攝影，親自出馬攞齊長鏡鐵梯在台下影Gigi，做做吓仲搞咗幾本娛樂雜誌，佢冇乜架子，娛樂圈上下都識佢，好多藝人都係佢朋友，當然包括佢最迷嘅Gigi。
莫講做朋友，同fans做埋情人甚至夫妻都唔少，頭先講校長同肥萍，其實校長嘅紅顏知己Wendy都係佢fans，聞說朱麗倩都係劉德華fans。大陸有個好極端嘅例子，馬蓉讀大學時是王寶強超級fans，後來二人相遇一見鍾情，做埋夫妻，生咗個女，一直都係恩愛夫妻模範家庭。點知今年爆出馬蓉原來同王寶強經理人宋喆婚外情多年，逼於無奈同佢離婚，點知連現金都被佢攞走，要借錢打官司，出軌嘅馬蓉仲入紙分王寶強身家，從粉絲變成人生嘅惡夢，呢單都算經典。
有啲瘋狂fans仲會為藝人帶來安全問題，例如官恩娜2006年被男歌迷衝上台強吻10秒，因為發生得太突然，隔離個司儀林盛斌想救都救唔切，事件震驚全港。另外薛凱琪2008年在一個慈善活動中，無啦啦被一個瘋狂fans擲膠樽襲擊，膠樽仲裝有液體，如果係腐蝕性後果就不堪設想。香港都未去到攞人命，外國就可以好恐怖，今年日本偶像富田真由行路去工作地點途中，有個騷擾佢多時嘅男fans走埋去送禮物，富田唔敢收，結果該fans刺富田30刀，刀刀攞命，好在富田大難不死，昏迷兩星期後恢復意識。至於攞命嘅case當然唔少，其他唔使講，John Lennon就係被瘋狂fans槍殺。
所以做公眾人物，對於瘋狂fans真係要小心處理，畢竟愛同恨之間，有時只差一線。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
