【now.com】有報章訪問《同班同學》導演陸以心，她讚王宗堯敢於面對激烈床上戲，還說：「我係演員。」睇完，我打幾個冷震。
確實，他真的有演員道德，完全豁了出去，事實上看得出《同班同學》很多演員都是這種類型，例如三個女主角和李拾壹，他們都幼嫩而勇猛。
我不知道拍攝時他們有沒有一直將「我是演員」掛在口邊，但這句說話其實很超現實，甚至乎帶點肉麻，因為在香港，已經很少會聽到人以擁有職業道德為榮。
舉個例，你深夜在樓下見到看更，讚他有精神，他絕對不會答你：「我係保安員。」最多只會答：「搵食啫陳生。」
確實大部分打工仔都是怕冇咗份工，多於尊重自己份工，打cold call的營業員日日被人用粗口鬧，沒鬧番轉頭的原因是要開飯，而不是因為有營業員的自覺，放工就真見章，試下放工再被人鬧，睇下仲忍唔忍你？
梁振英都冇講句：「我係特首。」然後站出來幫我們解決土地問題，冇屋住的始終冇屋住，囤地的始終在囤地，丁權不敢碰，就拿郊野公園開刀。他的職責要平衡各方利益，但到現時為止都只偏袒一方，這就是沒有職業道德的表現。所以更多時候，職業道德成了批判的一個標準，以梁振英為例，有市民常會問：「你係咪特首嚟㗎？」
問得出這句，因為覺得你不稱職。這種批判更常出現在打工仔圍內，用來質疑一些態度散漫的同事，例如遇到只會聽吩咐畫圖，完全沒主見的人，你會問：「你係咪設計師嚟㗎？」係喎，個title明明係設計師，但返工唔需要設計咁得意嘅？點解唔改做畫圖師？
但有時這種批判，會被有心人利用，成為壓榨下層的工具。新鮮滾熱辣的例子，有周刊報道TVB拍《殭》，為減成本，居然要配角共用特技隱形眼鏡！更傳聞陳瀅中了招。係咪痴線，隱形眼鏡可以共用，咁假牙都可以夾份戴啦？廁所都不用分開幾格，一齊去吧！有人覺得這種不平等待遇，演員都要出聲，問題是出聲後只會換來一句：「你係咪演員嚟㗎？」原來做演員，特別是未紅的演員，連衛生都要犧牲。
我係演員，所以犧牲色相；我係演員，所以共用隱形眼鏡。這個圈就是如此灰色。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
