【Viu】香港樂壇突然掀起咗一場「仙界大戰」，COLLAR隊中兩位「仙界女神」 Ivy So、Candy宣布同時出solo，分別推出首支派台歌《給你一隻大口仔》、《直白》！而事前佢哋率先進行咗3場battle「Canvy搶先出歌（MV）大作戰」嚟決定出MV先後次序，喺「鬥快讀慢歌」、「拗手瓜」、「忍笑」3 round嘅比試中，雖然Candy喺round 1以高速花式轉音，技術性擊倒Ivy So，但Ivy So憑住驚人嘅臂力、忍笑深厚嘅功力連追兩局勝出！
Ivy So為新歌獻填詞初體驗，希望透過歌曲令所有正在努力中嘅人，都有一種被擁抱、關愛嘅感覺！佢自爆創作靈感係嚟自自己個花名「大口蘇」：「呢個名陪咗我咁多年，開始覺得象徵住自己好開心一面！」又指好姊妹Winka、Gao、Candy有喺份詞上畀意見，Winka更係一聽就感動爆喊，而Gao、Candy則發現到歌詞入面藏有彩蛋，各位「蘇蝦」都可以搵搵！
至於Candy嘅新歌就好榮幸搵嚟Wyman填詞，以愛情故事作包裝，帶出面對所有關係，都要直接表達自己想法同感受！Candy自認係直白同簡單嘅人：「呢首歌都對自己作一個提醒，對屋企人都要直接啲表達感受同愛，有時我好怕醜，唔敢對家人講『我愛你』、『多謝』！」
過往COLLAR成員單飛出歌都有唔錯嘅成績，所以Ivy So話超有壓力，喺諗歌嘅類型都諗咗超耐，最後揀咗唔會令自己後悔，展現自己內心深處嘅一面！不過Candy就話壓力來源唔係成績，反而係因為solo要自己面對，冇咗班姊妹分擔！
另外，Canvy坦言呢次「正面交鋒」零比較，默契好到加零一嘅佢哋指solo之旅係互相扶持、陪伴，有咩嘢都會開心share、討論，相反係驚大家以為佢哋有比較添！唔講咁多，快啲去loop爆Canvy各自嘅新歌啦！
影片來源：IG@makers.weare
