【Viu】《MIRROR 7th Anniversary - GAME of MIRROR：閃避球挑戰賽》今晚進行第一場，MIRROR以《WE ARE》揭開序幕，然後藍白兩組成員逐一登場，High爆嘅姜濤以「咆哮Mode」顯霸氣；Anson Lo就先晒「神臂」，但呢位「可愛教主」忽然蕩失路行錯邊，咁Cute Cute得唔得㗎！
至於今日正日生日嘅Jer，除咗以「風之子」速度跑入場外，仲起埋飛腳；而「呂記者」Edan噚晚Last Day後，今晚即刻轉做「運動呂王」，掂過金牌嘅佢，出場方式都特別威風。早前親認受舊患困擾嘅Ian，就喺膝頭黐上運動膠布保護，安全第一！其後全場鏡粉齊齊高呼藍白兩組嘅Dem Beat，氣氛超High呀！
比賽過程唔重要，最重要係睇靚仔，打波結果真係8:8打和，皆大歡喜！而計埋其他小遊戲，今晚暫時係白組以3:1先拔頭籌。適逢今日「舞王Jer」生日，好兄弟Edan除咗喺社交網站「低炒」壽星仔外，喺球場上都箍實阿Jer嚟「食波餅」，小編都忍唔住久違地講返句「Jerdan is real！」當MIRROR唱完《手印》後，大會推出寫上「舞王Jer 生日快樂」嘅錦旗造型蛋糕賀壽，全場MIRO仲大合唱生日歌添，祝賀「柳3歲」榮升「柳33歲」，「團媽」Jeremy仲溫馨提示Jer唔好再好似噚晚咁整跌蛋糕呀！
