【2025年4月19日】33歲Arnold郭子豪同29歲Amber鄧卓殷拍拖6年，今日拉埋天窗，一早先喺教堂舉行婚禮，夜晚就喺中環嘅一間五星級酒店擺酒！一對新人喺傍晚現身會見傳媒，着白色高衩tube dress嘅新娘子Amber大露美背兼長腿，又晒埋手上1卡半鑽戒，佢哋更化身「接吻魚」，錫足半分鐘，勁sweet！
呢對新婚夫婦不約而同話噚晚緊張到瞓唔着，Arnold自爆今日全程都變咗做大喊包，喺教堂行禮嗰陣甚至係喊到腳軟！Amber笑言都預咗老公仔咁感性，講到最感動嘅moment，佢哽咽話係講誓詞嗰part，二人更即場講多次愛的宣言，盡情地放閃！
提到今朝接新娘玩新郎部份，Arnold扁嘴話估唔中老婆仔個唇印，所以被懲罰開門利是要加碼，咁最終畀咗幾多位數字開門利是？Arnold仲玩咗咩遊戲係要解bra扣？之後有生B計劃？二人雙雙離巢後，喺工作上有咩大計？
至於今朝喺薄扶林伯大尼小教堂行禮，一對新人喺親友見證下進行結婚儀式，著住長長婚紗嘅Amber翹住鄧爸爸手臂步入教堂，當爸爸將新娘交俾新郎時，仲好不捨咁囑咐Arnold要好好照顧佢個女，Amber聽到眼泛淚光！新人宣讀誓詞時都忍唔住喊，當律師宣佈二人正式結為夫妻後，Arnold同Amber相擁深情一吻，相當浪漫！之後佢哋就喺Harley-Davidson電單車車隊開路下，出發到酒店準備晚上婚宴！即刻去片聽吓佢哋點講！喺度祝一對新人新婚快樂、白頭到老、永結同心！
