【Viu】JayFung馮允謙、DearJane、Cloud雲浩影及Jace陳凱詠，今日喺啟德體育園主場館演出「FOUR in LOVE 萬人 CHARITY LIVE 2025」慈善演唱會，係呢個新場館第一個演唱會，現場所見只開1/3觀眾席，約1萬8千觀眾入場，本定於6點開始的演出，結果遲咗半個鐘才開騷，觀眾則提前兩小時到達，於4點開始經過安檢後如貫入場，而文化體育及旅遊局局長羅淑佩亦有現身監督！
JayFung成為首位站上該場館舞台獻唱嘅歌手，率先唱咗幾首首本名曲，包括《遠在眼前》及《會再見的》，佢喺台上話作為首位演出歌手，相當緊張，後來仲拎出手機同觀眾selfie及拍片，話要留住呢一刻！
接住出場係JayFung師妹雲浩影，Cloud獻唱《願望之翼》等等，獲得不少掌聲，Cloud話好開心喺呢度同一班可愛白雲造型嘅小朋友一齊表演，仲叫佢哋自我介紹添，佢話諗返起細個都做過喺側邊唱歌嘅小朋友，更開心係今日有呢個場地，可以喺過萬人面前唱歌，仲話想聽吓過萬人嘅歡呼聲添喎，觀眾們當然冇托手踭啦！
輪到Jace陳凱詠出場，佢唱《間歇性休眠》時，全場氣氛超熱烈呢！最後Dear Jane演出，一首《不許你注定一人》變成全場大合唱，好澎湃呀！
演唱會尾聲，所有歌手上台大合唱《Happy Together》，再嚟個全場大合照，演唱會喺delay半個鐘左右完結，其他一切順利，想睇呢個啟德主場館第一騷，快啲click入嚟睇現場實況啦！
