【Viu】劉青雲同吳鎮宇日前率領韋羅莎 、袁富華 、黃又南 、栢天男 、顏卓靈等一班演員為新片《談判專家》謝票，主持人問拍呢部電影最大挑戰係乜？袁富華爆料表示拍攝現場，導演畀佢簡單幾句對白就要上場演出，佢叫鎮宇哥哥「射住」，鎮宇話：「啱啦，唔知做乜就啱，唔知頭唔知路得嘞，做啦！」
鎮宇喺另一場謝票有解釋：「其實我唔係唔想幫你，但係我都唔知個劇本點搞，同你一樣去到現場再算。你應該問劉青雲嘛，佢成個劇本背晒！」青雲笑笑口話：「係呀，拍呢部戲最大嘅挑戰就係吳鎮宇，因為導演同我講萬一吳鎮宇唔得就靠你嘞，青雲！」而飾演青雲老婆嘅韋羅莎，作為後輩壓力當然唔少，但原來青雲唔係表面咁嚴肅，私下好鍾意講廢話氹人開心，人品真係好到無得頂，想睇更多兩位影帝你一言我一語舌劍唇槍，唔好等，即刻去片！
