今年樂壇新人百花齊放，競爭激烈，三人男子組合P1X3L作最後衝刺，日前推出新歌《Just Lean On Me》，以暢快舞曲喚醒大家體內嘅青春熱血，同時畀歌迷見證佢哋嘅蛻變。
Photo／大會提供
繼《Braceless》、《Oh My 7 God（JNYBeatz Remix）》後，P1X3L今次喺新歌表現到更成熟嘅歌藝同默契。《Just Lean On Me》MV將於星期一（22日）推出，內容講述成員Phoebus（吳啟洋）、George（歐鎮灝）同Marco（葉振弘）喺餐廳任職小店員，但不甘安於現狀，希望追逐夢想登上更大舞台，所以毅然跳出comfort zone。
為趕上MV拍攝進度，三子直踩12個鐘，由天黑拍到天光，但都能保持著精神滿滿嘅狀態，果然青春係最大本錢。P1X3L表示好期待見到成品，因為覺得場境、燈光、色調等等都有KPOP感覺，希望能夠為大家送上驚喜。三子表示：「好感動！因為呢首歌半年前已開始籌備，一直排舞、練歌，雖然舞步比《Braceless》更複雜，但都好有信心，而且希望現場演出時唱、跳都能取得平衡，每次演出都可以交出最好表現。」
Photo／大會提供
Photo／大會提供
Photo／大會提供
早前P1X3L無機會出席叱咤頒獎禮記者會，各成員難掩失落，喺IG坦言渴望參與其中，網民都戥佢哋唔抵。ViuTV董事兼總經理魯庭暉噚日亦出Po打氣，「我去過幾次叱咤，見到DJ，歌手，創作人，心口都有一個小小嘅金色叱咤pin。咁好貪心嘅我就恨啦，想要個。不過係無方法嘅，因為嗰個pin真係just for 歌手，創作人嗰啲，觀眾係無嘅。好啦，咁我同自己講，我攞唔到唔緊要，希望之後我可以令到多啲人攞到嗰個pin都好呀。」又貼出P1X3L新歌封面，叫大家多多支持：「請上YouTube，search首歌，聽下。」
