跳唱組合P1X3L早前上《七救星》搵玄學家七仙羽（七師傅）指點迷津，期望提升星運，七師傅唔只幫佢哋改法號「OMG」，更加出力助攻，同三子合作出歌《Oh My 7 God (feat. 七仙羽) – JNYBeatz Remix》，體現「師傅愛你」精神！
《全民造星II》出身嘅Phoebus（吳啟洋）、George（歐鎮灝）同Marco（葉振弘），今年組成男團P1X3L正式出道，雖然同MIRROR一樣走跳唱組合路線，但人氣程度同師兄依然相差好遠。默默耕耘嘅P1X3L，希望透過《Oh My 7 God (feat. 七仙羽)》，以自嘲方式提醒大家唔好放棄，「呢首係一首充滿正能量嘅歌，歌曲表達咗我哋自入行以來嘅堅持同努力，同時希望想透過歌詞中嘅自嘲提醒自己唔好放棄。」
七師傅亦為佢哋加油：「呢首歌係希望叫人堅持，無論旁人批評你衣著、打扮、髮型都唔應該放棄。」P1X3L指好多謝七師傅賜名「OMG」，但仍然會以P1X3L名義同大家見面，「絕對無問題，大家叫我哋『OMG』，只係多一個親切嘅稱呼。雖然『OMG』容易記，但我哋仍然會用『P1X3L』，因為呢個名對我哋好有意義。但亦要感謝七師傅，因為『OMG』嘅誕生令更多人認識我哋。」
新歌MV充滿玩味，除咗有P1X3L型仔登場，仲有七師傅以觀音造型示人，觀眾都感受到佢哋落足心機。七師傅表示，睇好P1X3L將來會爆紅，所以無論改咩名都唔成問題，「不論你哋叫Facial又好，Puzzle都好，都無問題。因為而家網民已經認識你哋，剛才街上都有粉絲搵你哋簽名合照，所以咩名都無問題！」
