唯一對利迪基嘅好印象，係個賣相算係好少少。
(©AFP)
【Now Sports】咁就3年，好掛念上一屆，唔係因為喺度一路跟住愛隊寫咁多段稿，賺稿費，而係因為上屆隊意大利比今季紮實。今屆最憂心，始終係前鋒一環。
撰文：Malena（燕飛）
上屆睇意大利係開心嘅，揭幕戰大炒土耳其開局得好，之後再贏瑞士，其實感覺隊波開始由高峰慢慢回落，進入淘汰賽贏奧地利同比利時都唔容易，之後贏西班牙同英格蘭都係射贏12碼，或者咁講，回落得嚟仲啱啱好，就係咁贏咗15年嚟（自2006年世界盃）首個大賽冠軍。
呢3年，意大利變化太大，首先係延續跌勢，跌到世界盃都冇份踢，意粉一殼眼淚；上屆最感人一幕係睇住兩個大男人文仙尼同維埃里擁抱，依家一個已離任，一個天人相隔，好唏噓！至於基亞連尼、邦奴治、恩薛尼、恩姆比利都不在陣，唔同晒。
對史巴利堤係有期望，不過意大利唔係拿玻里，尤其係隊波鋒力唔太銳。如果冇記錯今屆意大利前鋒除咗史卡馬卡，冇第二個意甲入波達雙位數，咁都真係幾弊。史卡馬卡狀態係ok，但都唔似孭得起隊波，無論係用佢抑或係歸化嘅利迪基，都只能講句蜀中無大將，希望我睇錯啦！有時諗不如將費達歷高基艾沙移中，但咁嘅話側擊又弱咗。
唯一對史卡馬卡同利迪基嘅好印象，兩個賣相算係好少少。
當然對意大利喺死亡之組又未至於完全冇信心嘅，今晚第一場唔該打敗「A貨意大利」阿爾巴尼亞，贏唔到再鬥西班牙同克羅地亞，咁就唔得你死。
撰文：Malena（燕飛）
現在我老了，人家才說「你很好」。
歐國盃
意大利VS阿爾巴尼亞
Now TV 618台16/06 03:00直播