阿辛斯奧在奧運有份上陣。
(©AFP)
【Now Sports】下星期就到國際賽周，仲記得歐國盃2020時，西班牙國家隊請安歷基出場宣佈球員名單，睇住live嘅我見到佢一個皇家馬德里人都冇揀，其實係驚訝，而且好嬲。唔明點解佢會唔畀拉莫斯踢佢最後一次歐國盃……但今日睇返，原來西班牙隊冇皇馬人更好。點解呢？
撰文：June
當然，皇馬喺夏天真係冇咩人可以入選國家隊，唔係傷就係冇狀態，但安歷基選咗啲更奇怪嘅人選，真係令人費解。開始時見到80%後生仔嘅西班牙隊於歐國盃失利，諗住安歷基仲唔俾人炒？點知班後生仔愈行愈遠又熱血，去到4強，都算有交代。
去到奧運會唔係安歷基帶，就有番皇馬阿辛斯奧同華尼祖搭呢班後生仔，結果拎咗個銀牌。然後安歷基喺歐洲國家聯賽再一次一個皇馬人都唔叫，西班牙結果又殺入決賽，雖然不敵有皇馬賓斯馬嘅法國，但一班後生仔都好落力，相信佢哋下年世界盃會有睇頭。
冇皇馬人可能西班牙隊更好？
其實係倒番轉，原來皇馬冇人入選西班牙隊或者係好事。因為球季開始咗幾個月，就見到踢歐國盃同奧運會嘅柏迪、謝拉特摩蘭奴、奧耶沙巴、奧姆相繼喺開季後受傷，奧耶沙巴更踢埋歐國聯，到底係咪踢完一季又踢兩個大型比賽，冇咩休息之下又開季嘅結果？
唔知今次西班牙隊有冇皇馬人入選。雖然入選國家隊係榮耀，但阿Q啲講無FIFA「病毒」，至少皇馬嘅西班牙球員冇咁多傷兵，對皇馬球迷嚟講，西班牙隊冇皇馬人更好。
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。