【Now Sports】每談起葉鴻輝,你會想到甚麼?當然是出色守門員。疫情嚴峻,港人俱要自我克制,如想「守」得雲開,誠然要像葉鴻輝所言,抱永不放棄的香港精神,堅持下去。
「由於球會停操,自己每日落去屋企樓下平台大約做一個鐘頭力量同速度訓練,希望保持狀態,應付遲吓開番嘅操練或者比賽。同平時最大分別係因為自己位置係龍門,需要接波,或者落地撲救嘅練習,但因為地方所限,冇咗呢方面嘅訓練,變咗第日要攞番接波同落地嘅感覺。依家最緊要係維持良好體能狀態,keep住肌肉量同好嘅心肺,相信遲啲重拾接波或者落地感覺都容易啲。
對於今次疫症最大體會,係應該關注大環境,唔好集中喺個人。個人依家要忍耐,或者有好多嘢做唔到,但為大環境要克制自己,盡量減少出外,始終大環境比個人重要,如果人人都做得好,疫情好快會好轉。
嚟緊目標係疫情一過,如果球季可以順利舉行,當然希望為東方雄獅攞到好成績。我哋已經入咗兩個盃賽決賽,希望贏到冠軍,尤其係足總盃。始終球會季初目標都係希望攞到下年亞洲賽資格,希望順利恢復正常比賽,而我哋東方雄獅攞到冠軍。
雖然今次疫情對各行各業打擊好大,我哋好多嘢都唔能夠正常咁去做,但香港人都要繼續體現永不放棄精神,呢個就係香港人精神。希望大家堅持落去,當疫情過去就好快回復正常,繼續創造美好。」
葉鴻輝
(足球)
【編按:sports.now.com請來本地體壇精英親述最新訓練狀況之餘,與港人互勉,一同集氣共度時艱。】
明日預告:
施寶盛(花式足球)
相關文章:
【港將抗逆集氣】麥卓穎:多謝無私與自律
https://sports.now.com/home/other/details?id=28969246962
【港將抗疫集氣】陳肇鈞:回復應有嘅香港
https://sports.now.com/home/news/details?id=28955788778
【港將抗疫集氣】王蘊妮:低處未算低
https://sports.now.com/home/other/details?id=28939445745
【港將抗疫集氣】周健宏:荒謬疫症一齊捱!
https://sports.now.com/home/other/details?id=28939445707
【港將抗疫集氣】呂麗瑤:為飲杯靚咖啡感恩
https://sports.now.com/home/other/details?id=28925719814