【A&M Diary】車仔麵可以話喺港人嘅comfort food，多款嘅配料同麵底，香濃嘅醬汁同湯底，可以組合成過千種嘅配搭，選擇出最適合自己嘅口味，深受港人嘅喜愛，所以喺各區各邨，都唔難搵到車仔麵檔，喺屯門嘅代表就有肥仔嘜車仔麵。
鳳爪、豬紅、冬菇、雲吞配腩汁湯底
冬菇同鳳爪都係店家推介之一，兩款都係非常吸味嘅食物，冬菇口感爽滑，每咬一啖都食到腩汁嘅味道；鳳爪肉質軟腍，外皮吸汁，越食越滋味！雲吞係店長推介嘅街坊至愛，皮薄蝦味濃，絕對有潮州粉麵店嘅質素。
金錢肚、糖心蛋、雞翼、豬皮配麻辣汁湯底
金錢肚口感彈牙，越食越有嚼勁，陣陣滷水味一咬而出；雞翼同豬皮係傳統車仔麵嘅必有餸菜，除左本身嘅滷水味，加上麻辣汁嘅配合，食到濃酥嘅滷水之餘，亦有麻辣帶來嘅刺激感，極具層次。
