【A&M Diary】位於主教山，落成於1904年嘅前深水埗配水庫，因為進行水務工程時被意外發現後，隨即成為港人焦點！前深水埗配水庫結合歐洲傳統風格嘅花崗石柱及仿羅馬紅磚嘅拱券為建築設計，因此極具價值，更被評為一級歷史建築！經過活化後，前深水埗配水庫成為香港人嘅本地遊熱點，想親歷百年歷史，可以參加免費嘅導賞團或自助導賞遊。
1. 前深水埗配水庫攻略 | 導賞團
預約網址：www.waterconservation.gov.hk
想深入認識前深水埗配水庫，最好嘅方法當然係參加官方嘅導賞團，由資深嘅景區導遊逐一同團友分享前深水埗配水庫嘅百年歷史。導賞團分為個人或團體申請者，官方會按階段開放名額，由參觀日期前2個月或最少4日前，可透過網上預約系統申請，以先到先得為原則，所以假期及週末嘅名額通常一閃即逝，建議盡早預約。個人申請者最多可同時為4位成員報名，參觀當日必須年滿8歲，成功報名後，請記得準時去到集合地點（巴域街 – 近聖方濟各英文小學對出行人路）集合。整個導賞團長九十分鐘，除咗參觀配水庫內、外設計同建築結構之外，導賞員仲會介紹九龍食水供應嘅發展歷史，讓大家可以更深入了解呢座歷史建築。
2. 前深水埗配水庫攻略 | 自助導賞遊
預約網址：www.waterconservation.gov.hk
除咗導賞團之外，亦可參加前深水埗配水庫嘅自助導賞遊，官方會按階段開放名額，由參觀日期前2個月或最少1日前，可透過網上預約系統申請，以先到先得為原則。由於前深水埗配水庫自助導賞遊嘅名額相對較多，所以假期及週末嘅成功預約率較高！為讓更多遊客參觀前深水埗配水庫，所以不得於30天內重複報名參觀。個人申請者最多可同時為4位成員報名，參觀當日必須年滿8歲，成功報名後，可於參觀時段內直接前往前深水埗配水庫。場內亦提供自助導覽QR Code，亦可以了解前深水埗配水庫嘅歷史。
3. 前深水埗配水庫攻略 | 行前需知
– 參加者必須於參觀當日年滿8歲
– 做好防蚊措施
– 從巴域街出發至前深水埗配水庫需步行約15分鐘，路程主要為狹窄山路及梯級，需要一定的體力
– 大家記住愛護歷史文物
4. 前深水埗配水庫攻略 | 參觀前深水埗配水庫
由於當時香港配水庫容量僅為25萬加侖，加上當時香港供水系統嘅水力未能翻越障礙，所以香港迫切興建更大規模嘅儲水設施。當時由港英政府工務司署負責興建，以一個直徑達150呎嘅圓形，深20呎，達200萬加侖食水嘅儲水庫，於1904年8月10日落成，並向大角咀及深水埗一帶嘅居民提供食水。經過100年，配水庫被發現後，水務署為配水庫進行臨時加固工作，當中包括為保護配水庫加設玻璃天窗，以防止風化侵蝕；另外，亦加設內部照明、通風設備、消防設備、加建地台通道等設施。活化工程完功後，就開放俾公眾參觀。
