【A&M Diary】自從觀塘海濱全面開放之後，除咗為繁忙嘅工商業地區帶嚟休憩地方之外，喺海濱望去對岸，見到郵輪碼頭同港島摩天大廈嘅景色，突然有一種台場式嘅浪漫，兩個人不如嚟一次日劇嘅面對面奔跑，再去附近嘅磯の水產食日本菜啦！
串燒
喺呢個咁chill嘅環境，又點少得一邊傾計一邊食串燒呢？分別叫咗牛肋條串、牛舌串、白鱔串、大蔥雞肉卷作為前菜。白鱔外皮燒得香脆，魚油豐盈，更添風味；牛肋條同牛舌本身已經充滿濃厚嘅牛味，恰到好處嘅火侯，鹹香之餘仲有焦香味；至於大蔥同雞肉係串燒嘅絕配，嫩滑嘅雞肉加上鮮甜嘅大蔥，減少油膩感之餘，亦增加口感。
旬之壽司8點
8點壽司包括吞拿魚、油甘魚、章紅魚、三文魚、帶子、赤海蝦、海鰻同左口魚邊，款款新鮮高質，絕有誠意。特別喜歡左口魚邊，因為魚肉本身已經非常香滑，略略燒焦後嘅魚肉帶有一層魚油，更有入口即熔嘅感覺。
磯之卷
磯之卷用上鮮甜又creamy嘅海膽、細滑軟綿嘅吞拿魚蓉、飽滿脆口嘅三文魚子，組成極具口感嘅配搭。
