【A&M Diary】下午茶一向比午餐抵食，精打細算嘅你，如果可以安排彈性午餐時間，不如等到下午茶時段，除咗慳錢，CP值仲非常高呢！下午茶抵食就係人都知，但位於粉嶺，主打台菜嘅初遇，下午茶份量十足兼抵食，令人非常滿足！
花雕雞卷滷肉飯配紫菜貢丸湯及地瓜酥
下午茶嘅主食通常都會細份啲，但初遇嗰碗滷肉飯大大碗，醬汁香濃，豬肉油香十足，配上兩件帶有淡淡酒香嘅花雕雞，肉質嫩滑。另外，下午菜再配上紫菜貢丸湯同香脆嘅地瓜酥，你話係唔係份量十足兼抵食呢？
初遇小食拼盤
同朋友一齊share嘅最佳選擇，當然係小食拼盤啦！精美嘅九宮格擺盤，上面放有鹽酥雞、牛肚、豬大腸、雞卷、滷蛋、香腸、地瓜酥、脆魚塊、麻辣鴨血，可以一次過食勻多款台式小食。講到我嘅頭號最愛，就係超入味，嫩滑香濃嘅麻辣鴨血啦！好味到我哋要另外再encore多一份麻辣鴨血呢！
夜市鳳梨水果茶、台南鳳梨烏龍茶
下午茶嘅套餐仲可以以優惠價升級台式飲品，而近排天氣熱，最啱就係飲以台灣鳳梨作主調嘅飲品，配上茶底，兩款飲品都唔會太甜，非常解渴。
