【A&M Diary】喺呢啲天氣，食一碗濃郁又熱辣辣嘅台灣牛肉麵，真係會令人好滿足架！話說今日路經灣仔，喺準備返屋企之際，突然傳嚟一陣五香牛肉嘅味道，所以我哋一於食埋嘢再返屋企啦！嚟到灣仔嘅牛壹台食，餐廳設計風格夠晒清新，主打台灣料理，除咗牛肉麵，仲有好多台灣美食！
金梅地瓜條
地瓜條炸到金黃色，夠晒脆卜卜，上面鋪有金梅粉，份量算多，酸酸甜甜，非常開胃。
台式滷牛拌麵
滷肉飯平時就食得多，今日就試吓滷牛拌麵啦！滷水汁同樣香濃，牛肉入晒味，最鍾意啲牛肉夠晒大大粒，食嘅時候好有口感！食之前當然要將醬汁同肉碎撈勻啦，咁每一條麵條先會掛晒汁又入味。但就略嫌麵條煮得太淋，令食嘅時候有啲糊身。
川味香辣牛腱心牛肉刀削麵
重點當然係牛肉麵啦！我特登揀咗Q彈爽口嘅刀削麵，掛上川味香辣嘅牛肉湯，好惹味呀！湯底除咗濃香嘅牛肉味，仲有淡淡嘅川香麻辣味，好有層次架！至於牛肉軟嫩入味，重點係大大舊，食嘅時候非常滿足，份量夠晒多，食晒麵都仲有好多餸呀！
